كتير مننا يا جماعة بيفقد الأمل في حياته . . حتي لو جزء من الأمل موجود وفي ايديه بيضيعهفي موقف شوفته . . سبحان الله حقا
ماشية ولقيت قطة بتعدي الشارع . . والعربية ادامها . . اعتقدت انها هتستني العربية لما تعدي وبعدين تعدي
عدت وقولت خلاص القطة رايحة رايحة عدت العجلة الأولي من العربية وخلاص عند التانية . . قولت هنا هتروووووح فيها
اتاريها لو استنت ثانية واحدة بس كان زمانها ماتت
اهوه (( الثانية )) ديه كانت أملها . . طلعت ذكية واستغلت الثانية ونجت بحياتها
أنا لو في مكانها . . كان ايه هيبقي رد فعلي كإنسانة
بعدي الشارع خلاص العربية هتبقي في وشي من صدمتي هقول إني خلاص رايحة رايحة . . ولا هستغل أمل ولا نيلة
هقف في مكاني من هول الفاجأة
القطة استغلت آخر ثانية ونجت بحياتها . . لكن الإنسان بيقنع نفسه انه رايح رايح . . هيفضل واقف في مكانه ومش هيحاول ينفد بجلده
زي ما بيجيبوا كده في التي في . . واحد ييجي يعدي يلاقي عربية في وشه عقبال ما ملامح وشه تتغير وياخد نفسه علشان رايح رايح . . يكون العربية خليته فعلا رايح
ليه مش نركن كل حاجة ورا دهرنا ونعيش بالأمل اللي فاضل ونستغله لآخر لحظة
موقف تاني وبيحصل كتير
لما نيجي نذاكر وأكون مثلا جايبة مجموع وحش
وأزفت في المادة الأولي . . أجي أذاكر التانية . . الأمل راح إني أنجح . . و أقضيها فشل
أقول أنا كده كده قاعدة السنة ديه بدل ما أذاكر وأجد علشان الحق اللي فاضل . . لا . . هقعد ألعب واعيش نفسي في وهم اسمه الفشل وأخلق لنفسي الأحاجي
ما تيجو نفوق شوية
زي ما بنقول كده . . ( ( أنا كده كده داخل النار ) )
سلمنا بأمور تافهة وقعدنا نعصي نعصي ونزيد في المعصية وفي الآخر بدل ما ألحق نفسي أسلم بموت كل حاجة حلوة في حياتي
حتي التوبة . . الأمل اللي فاضلي . . مش بستغله
أسمع أغاني وأعصي أبويا وأمي وأفشل في الدراسة . . . الخ
ولما يكون ادامي أمل إني أتوب وكل حياتي تتغير للأحسن . . مش بستغله
القطة كانت ذكية أووووووووووي . . لكن احنا أول ما بنقع مش بنحاول نلم اللي فاضل مننا:
نرمي القمامة في الشارع ونقول عمر ما غيرنا هيتصلح
ادامنا نرميها في الباسكت ويبقي الباسكت ادامنا لكننا بنوهم نفسنا إن مفيش حد بيرميها في الباسكت
عندنا في جامعة حلوان سلات المهملات مالية الجامعة أحمر وأصفر وأخضر
يعني تقريبا لو معايا حاجة وعايزة ارميها مش لسة هدور ع باسكت لأنه هيكون في وشي
وفي الآخر لسة بيرموا ع الأرض
حتي إماطة الأذي عن الطريق
ادامي طوبة ولا حتة حديدة ممكن تعور حد ولا قشرة موز ولا أي كان . .
بكسل أشيلها وأقول وهما عمي يعني . . أكيد اللي ماشي هيشوفها
تخيل قولت كده وبعدها بثواني لقيت طفل صغير معدي داس ع قشرة الموز . .
اتزحلق اترمي ع الشارع وعربية خطبته دون قصد ومات مثلا
ولا حصلتله عاهة هتنكد عليه حياته . . ايه هيبقي رد فعلك ؟
تستني المصيبة تحصل وتفكر بعد كده إنك كنت غلطان
طب حتي أسهل حاجة يا راجل . .
لقيت لقمة واقعة ع الأرض . . لو شيلتها هتاخد حسنات تكسل تشيلها وتاخد حسنات وتكمل مشي ليه . .
اقف واشيلها واستغلها تكون في ميزان حسناتك
أمـــــــــور كتير صغيرة جدا بتحصل في حياتنا ممكن تكون سبب في دخولنا الجنة
قوم وقاوم واستغل الأمل ومش تسيبه
حاول وجرب واحمد ربك
سيبك من الأوهام اللي ملت دماغك والاكتئاب اللي ملي حياتك والتشاؤم اللي هيجيبك لورا
عيش الأمل وانتهز الفرصة واوعي تتطاطي لعفريت اسمه التشاؤم
شوف كده واستشعر معايا الحديث ده
قال رسول الله صلي الله عليه وسلم :
(( إذا قامت القيامة وفي يد أحدكم فسيلة فليغرسها ))
صدق رسول الله صلي الله عليه وسلم
الفسيلة هي الزرعة الصغيرة
لو قامت القيامة وفي ايديك زرعة صغيرة كنت هتزرعها هتقول خلاص القيامة قامت ومش هتنفعني
مش هتكبر وقيمتها الدنيوية راحت خلاص
خليك فاكرقيمتها الدنيوية راحت وانتهت . . لكن هتزرعها وهتكون لك في ميزانك حسنات
يارب أكون خفيفة عليكم وأتمني نخرج من التوبيك بحاجة
جزاكم الله كل خير لحسن استماعكم
By : Beautiful Soul
